Gorgondól

Ég fæ mér kvöldmat í hádeginu og morgunmat á kvöldin. Má þetta?

Ég hef þá áráttu (þegar ég er ekki að vinna) að snúa sólarhringnum við. A.m.k. segir mamma að ég snúi honum við. En ef ég geri það þá hlýtur sólin að ganga vitlausan hring og það bara hreinlega gengur ekki. Og ef út í það er farið þá gengur sólin bara ekki neitt því hún hefur engar lappir og enga undirstöðu til að ganga á.

Æðruleysi. Var ekki viss með merkingu þessa orðs fyrr en ég þýddi það yfir á ensku. Þá er það stoicism. Þá tala sumir um að taka einhverju með stóískri ró. Æðra hlýtur þá að vera einhver æsingur eða panikk. 

Svo er nú það... rólegan æsing. Eru þetta ekki andstæður?

Ég er þreytt. Það var allt of heitt í dag og ég vann hratt, sennilegast af því að ég drakk slatta af kaffi til að halda mér vakandi. Þetta getur ekki verið hollt. Ég þarf að fara að sofa fyrr.

En til að bæta orðaforða ykkar kjánanna þá er best að ég setji inn skilgreiningar á tveimur afar nytsamlegum orðum. Annars vegar Schaghmadash sem þýðir að vera með væntingar um málsverð og hins vegar Lockstuhl sem þýðir að bíða eftir leigubíl með fótinn fastan í leðju.

Jæja, sofisof..

Roðamaur

Ég hef komist að því að roðamaurar eru helber nörd. Ég er alltaf að finna roðamaur á röltinu á skjánum mínum. Auðvitað geta þeir lítið annað gert. Það er enginn markaður fyrir ponsulitlar tölvur því að þó svo að roðamaurarnir séu til í að kaupa þá eiga þeir bara enga peninga. A.m.k. ekki svo ég viti.

Og það hefur ekki virkað hingað til að segja við þá "Get a haircut and a real job!". En e.t.v. skilja þeir bara ekki ensku.

Já... mér tókst líka að koma út úr mér eitthvert kvöldið þegar ég var einhverju svefnmóki "To every solution there's a problem". En það er víst venjan að þegar maður er kominn með lausn á vandamáli að þá er vandamálið ekki lengur til staðar. Kannski við ættum að breyta til. Finna fyrst lausn og finna svo vandamál við lausninni. 

...

Það var víst haldin einhver tattúráðstefna um helgina og stóð í blaðinu að hún yrði haldin á Tunglinu. Ég veit ekki með aðra en persónulega finnst mér það full langt ferðalag til að mæta á eina ráðstefnu. Áreiðanlega dýrt að fara. En ég er náttúrulega ekki eyðslusamasta manneskja sem ég veit um.

Jæja, best að fara í sturtu.

Hejdå.

 

Maður lifandi

Úff.. vinnan tók langan tíma í dag.

Í gær var hræðilega gott veður en í dag var það unaðslega leiðinlegt. A.m.k. seinni partinn.

Hér er ein setning sem er alveg út í hött ef maður spáir í hana: Sækjast sér um líkir.

Ég veit ekki einu sinni hvernig ég myndi byrja á að þýða hana.

Það er gott að skilja. Nema e.t.v. ef maður skilur við konuna/manninn sinn. Ég hef aldrei prófað.

Hugarástand breytir skynjun okkar á heiminum. Og þar sem við dveljum frekar stutt í þessum heimi þá legg ég til að hver og einn haldi andlegu ástandi sínu sem bestu og líti jákvætt á lífið.

Þetta var ráðlegging dagsins.

Að lokum þakka ég aðdáendum mínum allan stuðninginn og einnig hetjunum mínum fyrir að bjarga mér... já, stundum þarf ofurmenni að láta bjarga sér. En það fær ekki hver sem er að gera það. Bara sérstakt fólk :)

Jæja, ég kveð um sinn.

Útlendingahatur

Ég varð afar sorgmædd þegar ég las fréttirnar áðan. Reið jafnvel. Ég vissi reyndar ekki vel hvort ég ætti að vera reið eða sorgmædd. Ég veit að fólk lítur á líf skepna sem ómerkilegra en mannlíf svo að þetta ætti ekki að koma á óvart en samt verð ég alltaf jafn hrygg þegar ég heyri af svona aðförum.

En mér fannst óþarfi að skjóta ísbjörninn sem var á röltinu í Skagafirðinum í dag. Hann var bara að kjaga um og gerði engum mein. E.t.v. vildi hann bara skoða nýja staði og kom til Íslands. Var of erfitt að finna deyfibyssu og svæfa greyið bara með henni?

Er það þá svona sem við tökum á móti útlendingum? Skjótum þá bara til öryggis ef vera skyldi að þeir hefðu eitthvað illt í huga.

Fuss!

Jæja, ég má ekki fara yfir á myrku hliðina í kjölfarið af þessu. Yfir í annað...

Pjátur. Ég vissi ekki hvað það var fyrr en fyrir tveimur sekúndum, en það er víst einhver blanda af tini og kopar og einhverju. Allavega er tinman þýtt sem pjáturkarl. En ef við þýðum það svo til baka þá yrði það réttilega pewterman.

Þetta var nú bara eitthvað. Ég man ekkert hvað ég ætlaði að skrifa hérna. Það var samt eitthvað sniðugt svo það eru ekki ómerkilegheitin sem létu mig gleyma því. Líklega bara slæmt minni mitt. 

Má vera að ég sé eitthvað mellódramatísk, og hvað um það? Þá er það bara þannig.

Brett Dennen er hress gaur.